#აიყვანეთავშესაფრიდან - ინტერვიუ ია ლოდიასთან

ინიციატივის #აიყვანეთავშესაფრიდან ფარგლებში მეორე დასაჩუქრებული გვყავს!

 ზოომარტის ახალი ინიციატივის - #აიყვანეთავშესაფრიდან GSPSA-ს (საქართველოს ცხოველთა დაცვისა და გადარჩენის საზოგადოება) რეკომენდაციით ზოომარტის მიერ ყოველთვიურად რამდენჯერმე დასაჩუქრდებიან შინაური ცხოველის პატრონები, რომლებმაც GSPSA-ს თავშესაფრიდან აიყვანეს თავისი ოთხფეხა მეგობარი და რეკომენდაცია გაეწიათ როგორც მზრუნველ მეურვეებს.

 ჩვენი ინიციატივის #აიყვანეთავშესაფრიდან მიზანია ხელი შევუწყოთ და წავახალისოთ თავშესაფარში ქუჩიდან მოხვედრილი ან მიტოვებული ცხოველების გაჩუქებას, რადგან ვთვლით, რომ მეგობარს ჯიშის მიხედვით არ ირჩევენ და განსაკუთრებულ მზრუნველობას სწორედ ის ცხოველები საჭიროებენ, რომლებიც თავის მომავალ პატრონს წლობით ელიან.

 7 თერბერვალს კომპანია ზოომარტის და მისი დამფუძნებლის, თორნიკე ელიზბარაშვილის მიერ დასაჩუქრდა ია ლოდია, რომელმაც GSPSA -ს თავშესაფრიდან ულამაზესი დოდო აიყვანა.
ჩვენ გადავწყვიტეთ უკეთ გაგვეცნო ია და მისი შეხედულებები ამ სამაგალითო გადაწყვეტილებასთან დაკავშირებით:

1. რატომ გადაწყვიტეთ თავშესაფრიდან ძაღლის აყვანა, ადრე თუ გყოლიათ შინაური ცხოველი?

- მთელი ცხოვრება მე და ჩემს ოჯახს გვყავს ძაღლი, შარშან ჩემი 11 წლის ჰასკი დაიღუპა, რამაც საკმაოდ დიდი სტრესი და ტრავმა მომაყენა. ძაღლს მიჩვეული ეზოც ძალიან ცარიელი იყო და დაახლოებით 1 თვეში მე და მამაჩემმა გადავწყვიტეთ ისევ გვეშვილებინა ვინმე და შეგვხვდა დოდო. მარტო ეზოს სიცარიელე არ ყოფილა მიზეზი, რა თქმა უნდა, ბავშვობიდან ძალიან მიყვარს ცხოველები და ყოველთვის ვეხმარებოდი ჩემს მეგობრებს უსახლკარო ცხოველების დაბინავებაში.

2. თუ პიროვნება ვერ ახერხებს შინაური ცხოველის თავშესაფრიდან აყვანას, როგორ ფიქრობთ რითი შეიძლება შეიტანოს წვლილი? თქვენ თუ შეგისრულებიათ მოხალისეობრივად ასეთი ტიპის სამუშაო?

- თუ ადამიანს არ აქვს იმის პირობები რომ თავშესაფრიდან აიყვანოს ცხოველი, შეუძლია მათ შესახებ ინფორმაცია გაავრცელოს სხვადასხვა წრეებში, რომ არაა საჭირო მაინც და მაინც უამრავი ფულის გადახდა ჯიშიანი ცხოველის შეძენისთვის, როცა ამდენი ოთხფეხა უსახლკაროა და პატრონს ელოდება. სოციალური ქსელებით დღესდღეობით ძალიან მარტივია გავრცელება, რომ ჩუქდება ლეკვი, კნუტი და სხვა, ეს მცირედი მაინც უნდა გააკეთოს პიროვნებამ.

3. რა ადგილი უკავია ოჯახში თქვენს ახალ მეგობარს?

- ჩვენი ახალი მეგობარი დღეს ოჯახის სრულფასოვანი წევრია, როგორც დამოკიდებულების, ისე მოპყრობის მხრივ. ძალიან პოზიტიური ენერგია შემოაქვს ნებისმიერ სიტუაციაში და მუდმივად კეთილგანწყობილია. პირდაპირ შემიძლია ვთქვა, რომ ხალისი მას შემოაქვს ჩვენთან, რითიც ყველას თანაბრად შეგვაყვარა თავი.

4. თავშესაფარში მცხოვრები ცხოველები ადამიანების კეთილ ნებას ელოდებიან..... რას ეტყოდით იმ ხალხს, ვინც ჯერ კიდევ ორჭოფობს ცხოველის თავშესაფრიდან აყვანაზე?

- იმ ადამიანებს, ვისაც ვერ გადაუწყვიტავთ, აიყვანონ თუ არა თავშესაფრიდან ცხოველი, ვეტყოდი, რომ საორჭოფო ნამდვილად არაფერია, პირიქით, ვფიქრობ, რომ თუ ადამიანი ერთგული მეგობრის ყოლას გადაწყვეტს პირველ რიგში თავშესაფარს უნდა მიაკითხოს, რადგან თავშესაფრიდან ცხოველის წამოყვანა დიდი ქველმოქმედებაა, შესაბამისად, ვისაც აქვს საშუალება და სურვილი საყოყმანო არაფერია.

 თუ თქვენც გაქვთ სურვილი თავშესაფრიდან აიყვანოთ ძაღლი და მისი სახით უერთგულესი მეგობარი იყოლიოთ ესტუმრეთ GSPSA -ს ვებგვერდის ბმულს: http://gspsa.org.ge/category/pets-for-adoption/ 

ექსკლუზიური ბრენდები